مش علمي






إية يا عم العنوان الغريب دة ..... موضوع اسمة كلام مش علمي في مدونة كلام علمي ... طب ازاي يا جدع .... تعال أقولك ياسيدي 
سبب كتابة الموضوع دة .... شوية تصرفات و عادات و حاجات كتير شفتها مش عجباني 
و هنتكلم فيها حتة حتة بالتفصيل 





الحاجة الاولى : تناول الاعلام لبعض المواضيع العلمية بشكل مختلف ... تضخيم و تحوير و حاجات تانية كتير 

لكن مش هية دي المشكلة .... كلنا عارفين ان الاعلام بيحور في كل حاجة ... المشكلة ان اللي بيصرح بالبيان دة بصدق نفسة 






مثلا : واحد بيفكر انة يستخرج علاج للسرطان من نبات طبي .... تلاقي الخبر (( مخترع مصري اكتشف علاج نهائي للسرطان ))


يقوم صاحبنا يقرا الخبر يصدق نفسة ... كل الناس تشير الخبر ... يبطل يفكر في بحثة أساسا ... علشانة خلاص اكتشف العلاج زي الجرايد ما بتقول و يغير اسمة على الفيس الى (( المخترع او inv أو Inventor ..... )) و يمشي في سكة الدولة مش بتدعمني .. و مش لاقي حد يتبنى أفكاري مع العلم انة ما فيش حاجة اسمها مرض السرطان .... لان ببساطة في اكتر من 200 نوع من امراض السرطان و هوة مش محدد حاجة منها و ممكن يكون ما قريش أي ورقة بحثية بخصوص الموضوع دة نهائي بس هوة مخترع و دة ما بيتقبلش فكرة انة يخسر في مسابقة ... علشان كدة ما بيكسبش خبرة و بيبطل يشترك و يقعد يفتي و يطلع القطط الفطسانة و أسباب فشلة (( الناس التانيين ))


الحاجة التانية : اللي خايف ان فكرتة تتسرق ... مع انها لسة حبر على ورق ... لا دة في ناس خايفة تخليها حبر على ورق حتى لحسن تتسرق (( العلم في الراس مش في الكراس )) و دة ما بيشتركش في أي حاجة و عايز يكلم الراس الكبيرة علطول مش عايز يدخل تصفيات و مسابقات علشان هوة اكبر من كدة بكتير ... و دة ما بيعملش أي نوع من التجارب خالص .. او بيتعب نفسة في قراية أي أبحاث و بتلاقي خلفيتة العلمية ضحلة جدا ... و مش عايز يقرا او يجرب علشانة متاكد من النتيجة (( او إحساسة بيقولة ان النتيجة صحيحة ))

الحاجة التالتة : اذكى طفل بالعالم

و دة عمل اللي علية و جاب فكرة ... (( ممكن تكون سطحية وممكن تكون عبقرية )) لكنة مش عايز ياخد أي خطوه بعد كدة علشان مقتنع بان المساعدة دية فرض واجب على كل الناس التانية و و دة بيسال و خلاص ... مش بيدور و غالبا بتلاقي الكلام دة على لسانة 

  • عايز حد بيفهم في الهندسة 
  • عايز معلومات عن ....... 
  • عايز قرد اعمل علية شوية تجارب 
  • ما حدش فاهمني 
  • ما حدش بيساعدني 
  • عندي فكرة تحل مشكلة ..... في العالم 
ما عندوش استعداد انة يتعب في حاجة ... كل حاجة لازم تيجي لية على الجاهز من غير ما يقوم من قدام الكمبيوتر .... من غير ما يقفل الفيسبوك حتى 

الحاجة الأخيرة : وصل تسجيل براءة الأختراع ... مش براءة اختراع ولا يثبت عبقرية الفكرة .... ولا حتى صورتك مع المحافظ... و لا حتى طلوعك في التلفزيون او الجرايد 

و اللي على راسة بطحة ..... 

بس خلاص 



هناك تعليق واحد:

Fady Doos يقول...

بجد حضرتك قولت اللى كان نفسي اقوله من زمان و فعلا بقت حاجه تخنق موضوع وصل براءه الاختراع اللى بيقدم علي اساس انه براءه نهائيه و لكن احب اطمن حضرتك ان المخترعين اللى بجدمش بيفرق معاهم الميديا و الشو الاعلامى و بيكمل ابحاثه عادى جدا و كان شي لم يكن